Երեխաների հատուկ ստեղծագործական կենտրոնի Վանաձորի մասնաճյուղի նախաձեռնությամբ՝ ի դեմս ղեկավար Սուսաննա Ապրեսյանի, Երեխաների պաշտպանության միջազգային օրվան նվիրված Շառլ Ազնավուրի անվան մշակույթի պալատում կազմակերպվել էր գեղեցիկ միջոցառում, որը կրում էր «Երջանիկ մանկություն» խորագիրը:
Միջոցառմանը ներկա էին Լոռու մարզպետի տեղակալ Գոռ Ասրյանը, Գուգարաց թեմի Սուրբ Գրիգոր Նարեկացի առաջնորդանիստ եկեղեցու հոգևոր հովիվ տեր Վահան ավագ քահանա Ազարյանը, մարզպետարանի, Վանաձորի համայնքապետարանի պաշտոնյաներ, բազմաթիվ հյուրեր:
Մշակույթի պալատի նախասրահում ներկայացված էին կենտրոնի սաների ձեռքի աշխատանքները: Երեխաները նաև բեմում էին և հանդիատեսին բազում հաճելի պահեր պարգևեցին պարերի ու երգերի գեղեցիկ կատարումներով: Հանդիսատեսը նաև կենտրոնի գործունեության մասին պատմող ֆիլմ դիտելու հնարավորություն ունեցավ:
Երեխաներին իրենց կատարումներով ողջունեցին նաև «Հորովել» երգի, պարի համույթի գեղարվեստական ղեկավար, երգիչ Արմեն Ներսիսյանը, հանդիսավար Գրիշա Հարությունյանը:
Միջոցառման կազմակերպման, կենտրոնի ակտիվ գործունեությունն ապահովելու համար Սուսաննա Ապրեսյանին իր երախտագիտության խոսքը հայտնեց Գոռ Ասրյանը: Նա, օգտվելով առիթից, շնորհավորեց բոլոր երեխաներին տոնի առթիվ՝ մաղթելով խաղաղ ու հաջողություններով լի ապագա:
Իր օրհնության խոսքը հղեց տեր Վահան քահանա Ազարյանը:
Բոլոր ներկաներին ողջունեց, Լոռու մարզպետարանին և Վանաձորի համայնքապետարանին, կենտրոնի բոլոր աշխատակիցներին, դահլիճում ներկա անձանց իր երախտագիտության խոսքը հայտնեց Սուսաննա Ապրեսյանը՝ նշելով, որ նրանց աջակցությունը կենտրոնի գործունեությանն ու մասնավորապես միջոցառման կազմակերպմանը շատ ոգևորիչ է և պարտավորեցնող:
