«Կարեւոր էր անդրադարձը, որովհետեւ կարող էր նույնացում գնալ իմ, կամ որեւէ նման պաշտոնյայի կնոջ միջեւ, ինչը ուղղակի ես չէի կարող հանդուրժել»:
Այս մասին այսօր Ազատություն ռադիոկայանի եթերում հարցազրույցի ժամանակ հայտարարեց ՀՀ վարչապետի տիկին Աննա Հակոբյանը՝ անդրադառնալով փարիզյան գնումների շուրջ ծավալված քննարկումներին:
Օրեր առաջ թերթերից մեկը լուր էր հրապարակել Փարիզում Հակոբյանի կատարած գնումների մասին, որտեղ նշել էին, թե նա մինչեւ «ատամները զինված» թիկնապահների ուղեկցությամբ «շոփինգ» է արել: Աննա Հակոբյանը անդրադարձել էր այս հրապարակմանը եւ իր ֆեյսբուքյան էջում գրառում էր կատարել գնումների մասին, ինչպես նաեւ նշել, թե որքան գումար է եղել իր մոտ Փարիզ մեկնելիս:
«Հարցն այն է, որ մենք, մեր հանրությունը այնքան սովոր ենք նմանատիպ վերնագրերին՝ որ «պետության ղեկավարի կինը կամ որեւէ բարձրաստիճան պաշտոնյայի կին որեւէ արտերկրյա այցի ժամանակ շրջայց է կատարել այդ երկրի խանութներում», մենք նույնիսկ գրել ենք, որ այցերը օգտագործում են հիմնականում շոփինգի համար: Կարեւոր էր, որովհետեւ կարող էր նույնացում գնալ իմ կամ որեւէ նման պաշտոնյայի կնոջ միջեւ, ինչը ուղղակի ես չէի կարող հանդուրժել, ես չէի կարող դրա հետ հարմարվել եւ պատկերացնել, որ ինչ-որ մարդ մտածում է, որ ես ինչ-որ մեկի նման նույն կերպ գնացել եմ Փարիզ աշխատանքային այցով՝ ընդ որում, մասնավոր, եւ ինչ-որ գնումներ եմ արել: Ընդ որում, հաշվի առնելով նախկին ինֆորմացիաների հիմքում ընկած այդ մարդկանց կարողությունների աստղաբաշխական թվերն ու ծավալները՝ մարդիկ կարող էին նույնիսկ դա պրոեկտել իմ վրա, ինչը ուղղակի չէր կարելի թույլ տալ»,- ասաց Աննա Հակոբյանը:
Անդրադառնալով այն մտահոգություններին, թե 300 եվրոյով Փարիզ գնալը կարող է վնասել երկրի հեղինակությանը, Հակոբյանը նշեց. «Ուզում եմ բոլորը հասկանան մի բան՝ ինչի համար են բրենդային հագուստները, թանկարժեք զարդերը, որոնք կրում են, դա ինչ-որ ստատուս ընդգծելու նպատակ ունի միայն: Ես որեւէ մեկի մոտ՝ ո՛չ Հայաստանի ներսում, ո՛չ դրսում, որպես վարչապետի տիկին, իմ ստատուսն ընդգծելու հավելյալ կարիք չեմ տեսնում: Ո՞ւմ մոտ պետք է ես այդ ստատուսը Հայաստանի ներսում ընդգծեմ: Համեմատության եզրով պետք է լինի. գնումներ անելիս կամ հագուստ ընտրելիս՝ ո՞վ պետք է լինի իմ համեմատության եզրը՝ ՀՀ նախկին իշխանավորների կանա՞յք, ովքեր, բոլորս գիտենք, ինչպես են այդ հնարավորությունը ձեռք բերել, որպեսզի ունենան x բրենդի կամ x արժողության զարդեր: Իրենց հե՞տ պետք է համեմատվեմ եւ ձգտեմ իրենց հետ մրցակցության մեջ մտնել. ջնջենք այս տարբերակը:
Իսկ ո՞ւմ հետ պետք է համեմատվեմ, օրինակ, Ֆրանսիայի կամ ԱՄՆ առաջին տիկիների՞: Հայաստանում, օրինակ, աղքատության ցուցանիշը 30 տոկոս է, Ֆրանսիայում, ԱՄՆ-ում՝ չնչին տոկոսներ: Հայաստանում միջին աշխատավարձը 350 դոլար է, Ֆրասնիայում՝ 4100, ԱՄՆ-ում՝ 5100. կամ Հասյատանում մեկ շնչին հասնող ՀՆԱ-ն 3600 դոլար է, Ֆրանսիայում՝ 36 հազար, ԱՄՆ-ում՝ 60 հազար դոլար: Այսինքն՝ ես պե՞տք է այդ երկրների նման կենսամակարդակ ունեցող տիկնանց հետ համեմատութան մեջ մտնեմ եւ ձգտեմ նրանց համարժեք գնումներ անել, հագնվել եւ զարդեր կրել. այս տարբերակն էլ ջնջեցինք: Ինձ թվում է՝ ես կլինեմ նույնը, ինչ մինչեւ հիմա եւ մեր հայրենակիցներին խորհուրդ եմ տալիս՝ դրա հետ կապված ավելորդ բարդույթներ չունենալ, որովհետեւ այն, ինչ փոխվել է, փոխվել է բոլոր իմաստներով, եւ ես չեմ պատրաստվում ո՛չ նման գնումներ անել, ո՛չ ամաչել իմ արած գնումներից եւ առհասարակ հաշվետվողականությունը կարեւոր է»,- եզրափակել է առաջին տիկինը:
Լրատվական աղբյուր` http://armtimes.com
