Վրաստանի վարչապետի այցի արդյունքներով մենք նոր խթան կհաղորդենք մեր քաղաքական, հումանիտար, տնտեսական հարաբերություններին, Վրաստանի վարչապետի հետ հանդիպումից հետո հայտարարությամբ հանդես եկավ ՀՀ վարչապետ Նիկոլ Փաշինյանը։
Նա ասաց, որ Հայաստանի ու Վրաստանի հարաբերությունները փայլուն են և շատ լավ։
Փաշինյանը նշեց, որ Վրաստանի վարչապետի կողմից շատ ամբիցիոզ ծրագիր է առաջարկվել։
«Մենք պաշտպանում ենք դա՝ փոխադարձ առևտուրը հասցնել մեկ միլիարդ դոլարի մակարդակի, դա կոնկրետ թեմա է, որի նկատմամբ բոլորս կարող ենք դիրքավորվել ու ունենալ ճանապարհային քարտեզ»,- ասաց ՀՀ վարչապետը։
Նրա խոսքով՝ առաջիկայում տեղի կունենա հայ-վրացական միջկառավարական հանձնաժողովի նիստ, որի առաջ կդրվի կոնկրետ խնդիր՝ հարաբերությունները զարգացնելու ճանապարհային քարտեզ ձևավորել։
«Ամեն դեպքում, կարող ենք արձանագրել, որ ամեն այցի հետ մեր երկրների հարաբերությունների մակարդակն ավելի է բարձրանում, մթնոլորտն ավելի ջերմ է դառնում ու կառավարությունների անդամների միջև հաստատվում են բարեկամական կապեր»,-ասաց Ն.Փաշինյանը՝ ընդգծելով, որ այս տեմպը պետք է անպայման շարունակել։
Լրատվական աղբյուր` https://www.aysor.am
